Geknelde Land

Aangesien Bok se kind Saterdagaand vermink, geskend, gemartel en toe genadeloos van kant gemaak is, het ek besluit om my lesers te bederf met 'n paar rate vir allerhande skete. Ons voorvaders het immers met kaal voete oor die Drakensberge geklouter, so die pyn van 'n onverwagse rekord-loesing moet in daardie perspektief gesien word... Ek vat eerder 'n Bok-loesing as wat ek 'n runaway kakebeenwa teen die berg af moet inhardloop met my voorlaaier op my rug en 'n assegaai wat by my ribbekas uithang. Dis hierdie tipe omstandighede wat al Die Briels se treffers geïnspireer het.

Dronkenskap (genees van) - Gooi ongemerk 'n bietjie perdesweet in die drank.

Hik - Rook hoendervere.

Hondbyt - Pluk van die hond se hare uit en verbind op bytplek.

Luise - Vryf mayonnaise in die hare en bedek vir 2 uur met stortkappie.

Snork - 'n Paar druppels olyfolie in elke neusgat.

Sooibrand - Drink twee eetlepels asyn. Die probleem sal vir 'n kort rukkie erger voel, maar dan verdwyn.

Sproete - Smeer bok- of donkiemelk aan.

Gewig verloor - Trek wilgerboomtoppe se blare soos tee, drink 'n koppievol drie keer per dag.

Vir mammas wat borsvoed - As jou borste geswel is van die melk en pynlik is, pak koue koolblare oor jou borste, binne jou bra en slaap daarmee. Dit stink maar werk soos 'n bom.

Bednatmaak - Vang 'n streepmuis, slag af en braai hom, gee vir die kind om te eet, moenie vir hom se dis 'n streepmuis nie, hy sal nie meer bednatmaak nie.

Ek probeer myself indink hoe dit lyk as 'n omie met 'n snorkprobleem wakker word terwyl sy vrou besig is om die Extra Virgin Olyfolie in sy neus af te gooi. En die bednatmaak?! My pa het maar net altyd vir my gesê dat die wors snaaks gestop is en dat dit my verbeelding is dat dit anders smaak. Ek weet ook nie hoe om 'n donkie te melk nie.